Brazil DIvI' qum (República Federativa do Brasil) 'oH Brazil woQ pong'e'. Brazil puH tIn law' Hoch tIng America Sepmey puH tIn puS. loS Sepmey nganpu' law' law' Brazil nganpu' law' puS. 2,128,719 meyrI' qelI'qam 'ab 'ej juch puHDaj. tIng America botlh, Atlantic bIQ'a' jojDaq 'oH. 'evDaq, Venezuela HeH, Suriname HeH, Guyana HeH, French Guiana HeH, Colombia HeH, Peru HeH, Bolivia HeH je retlhDaq 'oH. tIngDaq, Paraguay HeH, Argentina HeH, Uruguay HeH je retlhDaq 'oH. 3,683 qelI'qam 'ab bIQ'a' HeHDaj. Brazil puHHommey law''e' Dech bIQ'a'.

tuj 'ej yIQ muD motlh. tIngDaq, loQ bIr 'ach pIjHa' peD. Equator gho 'ay', Capricorn gho 'ay' je ngaS puHDaj. Sar Ha'DIbaHmey, tI je. puH jo law' ghaj.

DIS 1500, Portugal mID moj Brazil puH 'ej DIS 1822, qum'eghbogh Sep moj. DIS 1889, woQ yaSpu' wIvchoH rewbe'pu'Daj. DIvI' yoS, yoSmey, veng yoSHommey je ghaj DIvI'. DaHjaj, wa' DIvI' yoS, 26 latlh yoSmey, 5,564 veng yoSHommey je lutu'lu'.

bIQ'a' retlh vengmey tIn Dab Brazil roghvaH HochHom. tera'Daq, nIvqu' Brazil nganpu' mI', 'ach puH tIn luDab. 'ev luDab nganpu' puS. Seghmey Sar ghaj Brazil roghvaH. Brazil luDab Europe Sungpu', America Sungpu', Africa Sungpu' 'ej Asia Sungpu'. pIj Seghmey Sar ghaj no'. Portuguese Hol 'oH woQ Hol'e'. Catholicism lalDan pab roghvaH HochHom, 'ach qen law'choH Protestantism lalDanmey pabwI'pu'.

1 qun
2 qum, woQ je
3 puH
4 Depmey
5 roghvaH
- 5.1 Seghmey
- 5.2 Holmey
6 tIghmey
7 QeD, cham je

qunEdit

11,000 ben, Brazil luDabchoH roghvaHmey wa'DIch. DIS 1500, Brazil lupaw Portugal charghwI'pu''e' DevlI'bogh Pedro Álvares Cabral. qaStaHvIS 300 DISmey veb, Brazil luDabchoH je Portugal Sungpu'. wa'DIch, Brazil Sor Hap (Brazilwood) luSuq, ghIq na'ran naQ (sugarcane), qa'vIn je poch. ghIq baS qub luteq. wa'DIch, vum America Sungpu' 'e' luraD. DIS 1532, Africa Sungpu' lo'choH.

DIS 1808, BrazilDaq Haw' Portugal chuQun. luDev Maria wa'DIch ta', puqloDDaj je, João javDIch. Napoleon mangghomvo' nargh 'ej Rio de Janeiro veng luDabchoH woQ yaSpu', chuQun je. DIS 1821, chegh, 'ach lengvammo' malja' verghmey naw'choH United Kingdom 'ej nIvchoH Brazil patlh. ngugh "Brazil qum tay' Devbogh Portugal woQ" moj. mejpu'DI' João javDIch, Brazil qum lubaqmoH 'e' lunID ratlhbogh woQ yaSpu'. mID mojqa' Brazil luneHmo', vaylu'choH. may'meyvamvaD, tlhabmeH Brazil noH ponglu'. DIS 1822, jar 9, jaj 7, Brazil tlhab maq Pedro wa'DIch. tlhabbogh "Brazil wo'" cher. DIS 1825, jar 8, jaj 29, wo' tlhab ghovmeH mab lulaj Britain, Portugal je. cha' wo'meyDaq woQ ghajtaHmo' Bragança tuq, cha' 'ay'mey moj Portugal wo' net noHlaH. latlh tIng America SepmeyDaq, pIm tlhabmeH Qu'mey.

Britain wo' qum wIvlu'bogh rur Brazil wo' qum 'e' chID woQ, 'ach Austria wo' HI'tuy rurba'. DIS 1835, qaS toy'wI''a'pu' Daw' potlhqu'. Malêpu' Daw' (Malê Revolt) ponglu'. toy'wI''a'pu' lughajlu' DIS 1888 'e' botmeH, chut Do' (Golden Law) laj Isabel ta'Hom. ghIq, 'ItlhchoHmeH laSvaghmey, Europe Sungpu' law'qu' lumuvmoHlu'. Pedro wa'DIch cho' puqloDDaj, Pedro cha'DIch. qantaHvIS Pedro cha'DIch, QochchoH mangghom, qum je. Paraguay noHmo' qaS yolvam. DIS 1889, jar 11, jaj 15, qum lonnIS Pedro cha'DIch. ngugh, DIvI' qum ("Brazil yoSmey tay' qum") cher Deodoro da Fonseca 'aj.

qaStaHvIS vatlh DIS poH 19-DIch paS, vatlh DIS poH 20-DIch 'eq je, Brazil luDabchoH vagh 'uy' Europe Sungpu', tIng Asia Sungpu', Japan Sungpu' je. ngugh HachchoH Brazil 'ej 'ev charghlu' 'ej DabchoHlu'. HI'tuymey chermeH, wejlogh qum wIvlu'pu'bogh lonmoHlu'. cha'logh gheS Getúlio Vargas. DIS 1964, qumchoH QI' Sa'pu' Sar. gheSmeH Sa'pu'vam, jIj USA qum. DIS 1985, latlh qum pat cherlu'. qum Qang'e' wIvlu'pu'bogh rewbe'pu', 'ach chut yejmey nISlaHbe' Qang.

qum, woQ jeEdit

Brasília veng 'oH Brazil mon'e'. qum pat cher DIS 1988 chut'a' maqlu'bogh. Sep 'oSbogh qum yaS'a''e' ghaH Qang'e'. chut yejmey nISlaHbe' 'ej gheSHa'moHlaHbe' Qang. chut yejmeyvaD tlhIjnISbe' Qang. roghvaHvaD ngoy' roghvaH 'oSwI'pu'. DaHjaj Luiz Inácio Lula da Silva ghaH Qang'e'. DIS 2006, jar 10, jaj 29 ghaH wIvqa' roghvaH HochHom. DIS 2010, qum 'e' mev. woQ tlhab qItmoHmeH, law' woQ tlhachmey.

wej woQ patlhmey lutu'lu'. Sep loH DIvI' woQ. DIvI' woQ lulobnIS yoSmey woQmey, vengmey woQmey je. Rome wo' chut pat 'oH Brazil chut pat mung'e'.

qaSpu'DI' loS DISmey, Qang wIv roghvaH. wa'logh Qang rap wIvqa'laH roghvaH. chutmey chenmoH 'ej chaw' chut yejmey. cha' patlhmey lutu'lu'. yoSmey 'oS yej nIv 'ej roghvaH 'oS yej QIv. qaSpu'DI' loS DISmey, yej QIv jeSwI'pu' wIv rewbe'pu'. qaSpu'DI' chorgh DISmey, yej nIv jeSwI'pu' wIv rewbe'pu'.

puHEdit

'ev puH 'eSDaq 'oH Amazon ngem HochHom'e'. chanDaq, tIngDaq je, tI puS, HuDHommey je lutu'lu'. pa' luDab HochHom Brazil nganpu' 'ej pa' HochHom Du' naHmey luwIjlu'. Atlantic bIQ'a' HeH retlhDaq, 'op HuD SIrghmey lutu'lu'.

Pico da Neblina HuD jen law' Hoch Brazil HuDmey jen puS. nIv Amazon bIQtIq bIQ 'op. Paraná bIQtIq, Iguaçu bIQtIq, Negro bIQtIq, São Francisco bIQtIq, Xingu bIQtIq, Madeira bIQtIq Tapajós bIQtIq je bIH latlh bIQtIqmey potlh'e'. Iguaçu bIQtIqDaq, Iguaçu qojmey lutu'lu'.

muD tuj yIQ je ghaj Brazil HochHom 'ej qaStaHvIS wa' DIS, choHqu'be' muD Dotlh. 'ach tIngDaq, loQ bIr 'ej 'op yotlhmey jenDaq, rut peD. Amazon bIQtIq retlhDaq pIj SIS, 'ach chanDaq puH QaD tu'lu' je.

Brazil puHHomey law' Dech Atlantic bIQ'a'.

loHmeH, motlh vagh yoS'a'mey luqellu': 'ev yoS'a' (North Region), botlh 'ev yoS'a' (Central-West Region), tIng yoS'a' (South Region), tIng chan yoS'a' (Southeast Region) 'ev chan yoS'a' (Northeast Region) je.

45.27% Brazil puH ghaj 'ev yoS'a' 'ach puS nganpu'Daj. vengmey tIn bIH Manaus veng'e', Belém veng'e' je 'ach 'ItlhHa'qu' 'ej laSvaghmey Hutlh chuvmey. Amazon ngem luDab America Sungpu' tuqmey law'.

botlh 'ev yoS'a' luDab nganpu' puS. pa' bIH Pantanal puH yIQ'e', Amazon ngem 'ay' mach'e', Cerrado lav puH tIn'e' je. potlhqu' je Du' naHmey. potlh Brasília veng, Brazil mon.

mIp tIng yoS'a' nganpu'. yoS'a' bIr 'oH 'ej vogh jenDaq rut peD. luDabchoH Europe Sungpu' law'. tIghmey SIghchu' Germany no', Italy no', Portugal no' Slav no' je. potlh Porto Alegre veng Curitiba veng je.

mIp law' ghaj tIng chan yoS'a'. nganpu'Daj law' law', Hoch tIng America Sepmey nganpu' law' puS. pa' 'oH vengmey tlhoQ tInqu''e'. São Paulo veng, Rio de Janeiro veng je ngaS tlhoQvam. Sarqu' yoS'a'. malja' tlhoQ ghaj São Paulo veng. potlh je Minas Gerais vengmey tIQ Belo Horizonte veng je. yuQ HochvaD noy Rio de Janeiro bIQ'a' HeH.

'ev chan yoS'a' Dab 25% Brazil roghvaH. tIghmey SIgh Portugal mID bov, Africa Sungpu' tIghmey, America Sungpu' tIghmey je. yoS'a' mIpHa' 'oH 'ej qaStaHvIS poHmey nI' QaD muD Dotlh. noy bIQ'a' HeHDaj. potlh Recife veng, Salvador veng Fortaleza veng je.

DepmeyEdit

yaghghmey patmey law' ngaS Brazil puH tInqu'. tInmo' Brazil puH 'ej pImmo' Brazil yaghmey patmey, Brazil Depmey Sar law', Dat Depmey Sar puS. vatlh DIS Qav, pay' ghur roghvaH, mIp je. ghu'vammo' QatlhchoH Daqmey'e' Dabbogh Depmeyvam QanmeH Qu'. ngemmeyvo' Sor Hap teqlu'lI', chaw'chugh woQ pagh chaw'be'chugh. vaj tI puH tInqu', Depmey mutmey law' je luQaw'lu'taH. HochHom Brazil mutmey lutu'be'lu'pu'. DIS 2020, ngabpu' bID Hoch mutmey net noH.

pIj mutmey chu' lu'ngu'lu'taH 'ej Do'Ha' pIj ngabtaH latlh mutmey. BrazilDaq, 77 mughato' mutmey lutu'lu'. 3000 bIQ na'be' ghotI' mutmey lutu'lu'. Daqmey luQaw'lu'taHbogh Dab mutmey law' lubuQlu'bogh.

roghvaHEdit

SeghmeyEdit

Sarqu' Brazil roghvaH 'ej Seghmey law' ghaj. HochHom Brazil nganpu' lubuvlu'meH, loS juHmey luqellu'. wa'DIch, America Sungpu' chaH Brazil nganpu' wa'DIch'e'. Siberia lumej 'ej Bering bIQ He luvegh. cha'DIch, DIS 1500, luDabchoH Portugal Sungpu'. wejDIch, DIS 1530, pe'vIl Africa Sungpu' luqemchoHlu'. DIS 1850, toy'wI''a' malja' botlu'. tagha', vatlh DIS poHmey 19-DIch 20-DIch je, paw Sarbogh Europe Sungpu', chan Asia Sungpu', tIng Asia Sungpu' je.

wejlogh America luDabchoHlaw' chan Asia nganpu'. Brazil Sungpu' no' chaHlaw' ghom wa'DIch'e'. bov motlh ret (before the Common Era), DIS 9.000, Brazil lupawlaw'. Tupi-Guarani, Jê, Arawak Carib je chaH Sungpu' ghommey tIn'e'. bIQ'a' HeH Hoch luDab Tupi-Guarani nganpu'. 'ev HochHom luDab Jê nganpu'. 'ev luDab Arawak nganpu' Carib nganpu' je.

vatlh DIS poH 16-DIch, lupawchoH Europe Sungpu'. Portugal nganpu' chaH HochHom'e'. wa'DIch, chan luDabchoH. vatlh DIS poH 18-DIch, 'ev luDabchoH.

HochHom Brazil mung nganpu' luchotlu'pu' pagh Portugal tIghmey laj net raD.

latlh ghom potlh 'bIH Africa Sungpu' Seghmey'e'. toy'wI''a' chaH. DIS 1850, BrazilDaq wej 'uy' toy'wI''a'pu', vagh 'uy' toy'wI''a'pu' joq qemlu'pu'. mubtaHvIS toy'wI''a' ghajmeH 'eb, chen mungmey Sar ghajbogh Segh chu''e', pIj pe'vIl ngaghmo' qoj pIj parmaqmey pegh ghajmo' pInpu' chIS toy'wI''a'pu' je.

vatlh DIS poH 19-DIch paS, vatlh DIS poH 20-DIch 'eq je, Brazil luDabchoH Europe Sungpu' law'. lupaw vagh 'uy' pagh mI' nIv. cha' ghommey lutu'lu'. Du'mey mach QorghmeH, tIng jaH wa' ghom. 'ach qa'vIn pochmeH 'ej yobmeH, chan jaH HochHom DabchoHwI'pu'. Germany Sungpu', Italy Sungpu' je chaH HochHom tIng nganpu' chu''e'. Italy Sungpu', Portugal Sungpu', Spain Sungpu' chaH HochHom chan nganpu' chu''e'. vatlh DIS poH 20-DIch 'eq, Brazil lupaw Japan Sungpu', tIng Asia (Lebanon Syria je) Sungpu' je.

bIQ'a' HeH Dab roghvaH HochHom. 'ev nganpu' puS lutu'lu'. Europe mung lughaj HochHom tIng nganpu'. mungmey Sar ghaj HochHom chan nganpu'.

HolmeyEdit

Portuguese Hol 'oH woQ Hol'e'. 'oH jatlh roghvaH HochHomna'. DuSaQmeyDaq Holvam neH lo'lu'. QummeH 'ej mechmeH 'ej loHmeH, 'oH lo'lu'. latlh tIng America SepmeyDaq, motlh Portugal Hol jatlhbe'lu'mo', Brazil Sep ngu'meH potlhna' 'oH.

BrazilDaq PortugalDaq je, chenpu' cha' HolHommey. lupojlu'DI', choHqu'be' Brazil HolHom QIch pat net tu', vaj Portuguese Hol tIQ rur Brazil HolHom. Brazil HolHom luSIghchu' America Sungpu' Holmey, Africa Sungpu' Holmey je. motlh yajchuqlaH Portugal jatlhwI'pu', Brazil jatlhwI'pu' je, 'ach loQ pIm QIch pat, mu'tay' ghItlh pat je.

'op vengHommeyDaq, Hoch jajmey, Holmey Sar jatlh America Sungpu'. Portuguese Hol luSov Sungpu' law', 'ach Sungpu' Holmey lughojmoHlu' 'ej luchoqmoHlu' DaHjaj net tungHa'.

tIng Du'meyDaq, latlh Holmey jatlh no' nov ghajbogh nuvpu''e'. motlh Portuguese Hol lujatlh je. potlh German Hol, Pomeranian Hol, Venetian Hol je. São Paulo vengDaq, Japanese Hol lujatlh 'op nganpu' je.

DuSaQDaq DIvI' Hol HaDnISlu' 'ach lujatlhlaHchu' Brazil nganpu' puS. Spanish Hol luyajlaH Brazil nganpu' law'. puHmey HeHmey retlhDaq, luyaj nuvpu' law'qu'.

tIghmeyEdit

Portugal tIghmey bIH Brazil tIghmey mung'e'. Catholicism lalDan, Portuguese Hol, lurDechmey law' je luqem Portugal Sungpu'. Seghmey Sar ghajmo' Brazil, tIghmeyDaj SIgh latlh tIghmey law'. Hol, Soj je SIgh America Sungpu'. Hol, Soj, QoQ, mI'meH mIw, lalDan je SIgh Africa Sungpu'. potlh mI'meH samba QoQ, capoeira moQbara' je.

HochHom jajmey, motlh qurgh, tIr chIS, tangqa' ghab je luSoplu'. nay' motlh 'oH feijoada'e'. qurgh qIj, targh Daghtuj je ngaS 'oH. tlhorgh nay'mey law'. lav 'oQqar, ghotI' je luSoplu' je.

watlhchoHpu'bogh HIqmey qem Portugal Sungpu'. ghIq na'ran naQ (sugarcane) HIq lulIngchoH 'ej lutIvqu'choH Brazil nganpu'. naH HIq, tIr HIq je lutlhutlhlu' je.

QeD, cham jeEdit

São José dos Campos, Campinas, São Carlos, Rio de Janeiro, Curitiba, Porto Alegre, Belo Horizonte, Recife, São Paulo je bIH cham law' lIngbogh 'op Brazil vengmey'e'.

De' cham yuQ malja' SIghqu' India China je. Sepmeyvam De' cham rur Brazil De' cham, 'ach nIv Brazil qoD je'pu' mI'. vaj, latlh SepmeyvaD De'wI' patmey puS ngev. Sep qoDDaq ngevlu' 'ej malja' patmey, Hub patmey, CRM patmey, qum De' cham patmey, pIvmeH QaH patmey je lughunlu'DI', po'qu' Brazil De' cham. ngoq tlhab lo'choH 'e' nID Brazil qum 'ej ghajwI' ngoq lon 'e' nID.

logh chargmeH jInmol SeH Brazil logh yejHaD (Brazilian Space Agency). baHjan qach loH je.

Retrieved from "http://klingon.wikia.com/wiki/Brazil"

Wikia

tlhIngan Hol

Brazil

Contents